BCOM: DIE JAAR VAN DIE ROTTE

Amari Maré & Abygail Smit

@amari.mare & @abysmit06

 

Dink aan lekker riffs, harde dromme, ’n baslyn wat deur jou bors klop en kitare wat dreun soos ’n enjin wat nie wil afsit nie. Meng dit alles saam en jy kry die nuwe band op ons almal se lippe — BCOM.

 

Op 21 Februarie 2026 het BCOM ons studentedorp met hul unieke klanke by Snowflake infiltreer, saam met Spoegwolf en Herman Kleinhans.

 

Die band bestaan uit drie 26-jariges en een 19-jarige wat onlangs bygekom het. Toe die band begin het, was dit net drie manne, waarvan net een behoorlik ’n instrument kon speel. BCOM het toe twee lede na bas en elektriese kitaar geskuif, en Frans, die hoofsanger, het dromme gespeel. Hierdie dinamika het egter verander toe Liam deel van die groep geword het.

 

 

Vol selfvertroue, en met die gebruik van Instagram se direkte boodskappe, het Liam die BCOM-band gekontak en gesê dat hy dromme kan speel “as hulle hom eendag sou nodig hê”. Met die nuwe groepslid, kon Frans terugskuif kitaar toe, en die res is geskiedenis.

 

Wat as ’n stokperdjie begin het, is nou ’n bekende groep met ’n groot aanhang, genoem die Rotte. Hierdie naam het ontstaan toe Hendriek Bleik, wat ook ’n kunstenaar is, BCOM se albumkuns geskep het — ’n stuk van ’n UFO wat rotte aflaai terwyl hulle instrumente speel. Van daar af het die Rotte lekker vasgesteek. “Uit ’n meer filosofiese oogpunt kan jy jouself verbeel dat ons almal eintlik rotte is. Ons het almal ons klein skandes en geheime wat ons soms vuil laat voorkom,” verduidelik die band. Die BCOM-lede redeneer dat sommige luisteraars sal dink hulle is vreemd en vuil, maar wanneer hulle optree, is almal verstom deur hul bogemiddelde talent, wat hulle uiteindelik beïndruk.

 

BCOM se lirieke is ’n mengsel tussen Engels en Afrikaans, “want soms klink dit beter in Engels”. Hul lirieke hou verband met watter musiek hulle in daardie oomblik luister. Soms is dit grappig en soms is daar iets dieper wat jou laat dink. Partykeer besef die BCOM-lede nie eers dat hul lirieke sulke invloed op hul Rotte het nie. Wat vir hulle soos ’n gewone lyn klink, sing aanhangers kliphard wanneer hulle optree, en “dit verander die hele betekenis van die liedjie”. Alhoewel die BCOM-groep ’n groot hoeveelheid luisteraars het, maak dit hulle nie skrikkerig om op te tree nie. Die interaksie met die Rotte breek daardie vierde muur en maak die verhoog en die gehoor een.

 

Elke lid het ’n ander persoonlikheid, maar dit gee die groep meer diepte en perspektief. Tussen werk, universiteit, getroude lewe en die band, kan dit soms te veel raak om te bestuur. Daarom is die BCOM-band baie dankbaar vir Nicci, wat help met al die chaos agter die skerms en hulle op die pad hou. Nicci, die bestuurder van die band, beskryf die band as “collaborative” — mense wat mekaar sal vang en aanvul waar daar dalk ’n gaping is.

 

Musiek het ’n manier om verskillende mense bymekaar te bring. Die BCOM-band verskaf nie net ’n unieke, lekker styl van musiek nie. Hulle bied ook ’n plek waar mense saam kan sing oor gevoelens, kan kopskud op lekker ritmes en deel kan vorm van iets groter as hulself. Ons sien uit daarna hoe hierdie groep nog gaan groei en die musiekbedryf gaan aanpak.

 

 

Teksredigering deur Simoné de Witt

 

 

English Translation: 

 

BCOM: THE YEAR OF THE RATS

 

Think of killer riffs, intense drums, a bassline that beats through your chest, and guitars that rumble like an engine. Mix it all together and you get the new band on everyone’s minds — BCOM.

 

On 21 February 2026, BCOM infiltrated our student town with their unique sounds at Snowflake, together with Spoegwolf and Herman Kleinhans.

 

The band consists of three 26-year-olds and one 19-year-old, who recently joined. When the band started, it was just three men, with only one who could properly play an instrument. BCOM then moved two members to bass and electric guitar, and Frans, the lead singer, played drums. However, this dynamic changed when Liam became part of the group.

 

 

Full of confidence, and using Instagram direct messages, Liam contacted the BCOM band and said he could play drums “if they ever needed him.” With the new band member, Frans was able to move back to guitar, and the rest is history.

 

What started as a hobby has now become a well-known group with a huge following, called the Rotte. The name came about when Hendriek Bleik, who is also an artist, created BCOM‘s album art — an image of a UFO dropping rats while they play instruments. From there, the Rotte stuck. “From a more philosophical point of view, you can imagine that we are all actually rats. We all have our little vices and secrets that sometimes make us seem dirty,” the band explains. The BCOM members reason that some listeners will think they are strange and dirty, but when they perform, everyone is amazed by their above-average talent, which ultimately impresses them.

 

BCOM‘s lyrics are a mix of English and Afrikaans, “because sometimes it just sounds better in English”. Their lyrics relate to the music they are listening to at that moment. Sometimes it is funny and sometimes there is something deeper that makes you think. Sometimes the BCOM members do not even realise that their lyrics have such an impact on their fans. What sounds like a normal line to them, fans sing out loud when they perform, and “it changes the whole meaning of the song”. Although the BCOM group has a large audience, it does not make them shy about performing. The interaction with the Rotte breaks that fourth wall and makes the stage and the audience one.

 

Each member has a different personality, but this gives the group more depth and perspective. Between work, university, married life and the band, it can sometimes be too much to manage. That is why the BCOM band is very grateful to Nicci, who helps with all the chaos behind the scenes and keeps them on track. Nicci, the band’s manager, describes the band as “collaborative” — people who will catch each other and fill in where there might be a gap.

 

Music has a way of bringing different people together. The BCOM band not only provides a unique, fun style of music. They also provide a place where people can sing about feelings, shake their heads to fun beats, and be part of something bigger than themselves. We look forward to seeing how this group continues to grow and take on the music industry.

 

 

Translated by Simoné de Witt